Të du si bora vjet
***
Përditë shkoj në Rumi
me gurin mbajtë mbi shpindë
gjithmonë at’ ma të madhin
marrë poshtë kambëve të tij
e ngjitem pa ba za, pa folë me kënd
kur e uli atë peshë
takoj vedin që më flet,
më thotë që ia ka vlejtë
gjithë kjo ngjitje përpjetë
ia ka vlejtë
si për dekë ashtu dhe për jetë.
Këta gurë ia kanë vlejtë,
pa ia dà, qysh me diell e me hanë
se veç kur qesh më falë dy jetë.
Vrapoj teposhtë si e marrë
du me u ngjitë prapë e prapë
poshtë më presin gurë të tjerë
deri sa t’i mbaroj du me u ngjitë
kam frikë pa të taku,
kam frikë se shumë më kanë mësu me të harru.
Ngjitem e përditë ngjitem
herë si gru, herë si burrë
herë si fmi e herë si zog
të kish kenë për mu folenë te vedi e kisha ndërtu
me sqep e kisha gërmu
Nën zhurmën e gurëve që kamba i shklet
pëshpërimat më tregojnë përralla të lashta
të lashta aq sa fjala
por nuk flas, veç frymoj
kështu shkruhen përrallat thonë
vazhdoj gjithmonë ma lart
as sa guri jem i maparshëm ma lejon.
Zemër sa të mbarojnë ky mal, nuk të rrej,
veç atëherë kam me fjetë.
Të du si kjo borë
Durt i doja si kjo borë
që shpejt mblon atë çka din ma mirë
të ftohta
me më pasë frikë çdo zjermi
të bardha i du
që kur të bijnë mbi buzë me u dallu
me fije të holla,
që era me i marrë e me i hedh aty ku rrijnë ma mirë
kryeneçe, e lojcake
me u tërbu aty ku shkrihen e flejnë ma mirë
I doja si kjo borë
po parashikimet po thonë se nuk ka borë sivjet
nuk i besoj, ashtu si nuk i besova as vjet
e bora ra furishëm
tu na shkundë nga harresa në det.
***
Në qetsinë teme na nuk grindena ma
as nuk ndajmë hallet e jetës
as për fustane nuk flasim
as për ditën a andrrat e natës
as bajmë plane për festa a për verë
as nuk pijmë nji gotë venë
as nuk hajmë në komplete pjatash e lugsh
as përlajmë mandarinat nji nga nji
as retë nuk i shohim,
as presim diell për me adhuru hanën
as ecim në kambë a në biçikletë
as nuk ngasim për me kapë at’ që na humbi
as kërkojmë në sirtaret e nanës fotot e vjetra
as vizatojmë fjalë e fjalët me i ba vepra
as nuk e pimë ujin tu qeshë me të madhe
as nuk i fshijmë ma këpucët kur hyjmë diku
as nuk i bajmë flokët me bigutina
as shkojmë në vende të reja e të fshehta
as e as e as e as e as e as e as e as
të shoh veç në sy
më duket vedi e shëmtume pa ty.
Comments
Post a Comment