Daim Miftari: Poezitë që i dua
Mund të vijë një ditë
mund të vijë një ditë kur thua
ashtu si me mllef
në djall vafshin të gjitha poezitë e mia
të shkruara e të pashkruara
sa shumë jam lodhur me to
duke e vendosur çdo fjalë me përpikmëri
në çdo fjali
si një fëmijë i përhumbur në botën e lodrave të tij
dhe po si ai kam qenë i lumtur
kur kam besuar se ia kam arritur qëllimit
e po si ai prapë ia kam nisur lojën nga e para
duke menduar pastaj
se kam mundur të bëj një punë tjetër
më të lehtë ndoshta
kohën e lirë kot ta bjerr
dhe thjesht e ke kuptuar
që nuk je dhe aq i aftë për gjëra të tjera
Shkup, 15 mars 2015
Nëse nuk do të isha unë
nëse nuk do të isha unë
tjetër kush do të banonte
në apartamentin ku sot banoj unë
në të njëjtin qytet
në të njëjtën rrugë
në të njëjtën adresë
dhe ditët po këto do të ishin
me të gjitha stinët brenda
të gjitha ngjarjet
gëzimet mërzitë
fatet fatkeqësitë marrëzitë
si furgonë të stërmbushur mallrash
nëse nuk do të isha unë
tjetër kush do të qëndronte
në të njëjtin ballkon ku sot qëndroj unë
dhe netëve të vona nganjëherë
duke sodisur rrugën që fle
si udhëtarin e lodhur
nën dritat e neonta
dhe hijen e drurëve
befas mendja mund t’i shkonte
atje prapa maleve
në shtëpinë e fëmijërisë së tij
të cilën mund ta kishte braktisur
dhe tek ca ëndrra
si rroba të grisura
nga një degë e çoroditur ferre në rrugë
dhe tek fjala
fjala e dhënë
se në gjirin e vet do ta mbajë
fortë do ta shtrëngojë
dhe më kot veten do ta pyeste
ku humbi vallë
ai vështrim i hareshëm
ai gaz mënjolle
dhe si një zog nganjëherë
në një degë të bleruar prilli
në fytyrë mund t’i varej trishtimi
nëse nuk do të isha unë
tjetër kush njëjtë si unë
deri në asht mund t’i vuante
shtirjet padrejtësitë
dhe prap të ishte në gjendje të falte
duke u përpjekur të shikojë
përtej mureve të qelisë së tyre
pastaj të lodhur veten kur ta ndjente
nga zhurma urbane
për të qetësuar kokën nganjëherë
të ikte diku
larg shumë larg
nëse nuk do të isha unë
tjetër kush njëjtë si unë
mund të kishte miq
të dilte me ta
dhe bota t’i dukej e bukur
herë herë ta pështinte botën si unë
ta përbuzte fatin
që s’qëlloi në një vend tjetër
ku mund të jetonte më mirë
me familjen e tij
sepse mund të kishte grua dhe fëmijë
dhe të dilte fundjavave me to
të kujdesej për to
të brengosej për to
dhe të ardhmen e tyre
të lozte me to
në mbrëmje t’u lexonte përralla
dhe shpesh i zënë ngushtë
nga kureshtja e tyre
pyetjet një pas një
përgjigje të përpiqej të gjente
kur të rriteshin t’u rrëfente për jetën
dhe të shkuarën e tij
dashuritë e tij
ëndrrat e tij
pengjet e tij
dhe padashur një lot mund t’i pikonte
si uji i mbledhur në gjethe të drurëve
pas një rrebeshi kur era i fryen
dhe të thoshte megjithatë
se është i kënaqur
me gjithë ç’ka arritur në jetë
mund të kishte një bibliotekë me libra
të lexonte
çdoherë që t’i jepej mundësia
ta donte vetminë
ose mund të kishte një zanat krejt tjetër
s’është e thënë të shkruante poezi
Shkup, 15 mars 2015
Duke ardhë tek ti
sa dhembje
sa lot
sa plagë o Zot
sa herë ramë
dhe prapë u ngritëm
të fortë që kishim qenë
ah kurrë s’e harroj atë kohë
kur ti qaje
dhe me lot m’i laje
plagët
kur e vëreje
që e keqja keq më kishte goditur
se të shumta ishin dredhitë
urrejtjet
shpifjet
ligësitë
të trimërohen i kam parë
kur ti e shtrirë në shtrat
lëngoje
dhe unë kokën ta mikloja
si një fëmije
unë
fëmija yt
të ligështohen i kam parë
si mos më keq
se janë tmerruar
kur na kanë parë bashkë
edhe në ëndrra
o nënë
Qafëthanë, 3 qershor 2014
Odë për dhembjen
ngjitet shkallëve të apartamentit tim
sa herë që i bie ndërmend
kryelartë dhe me shpërfillje
hedh shikimin
nga fqinjët
dhe kalimtarët e rastit
kur ndodh që i zënë me ndonjë punë të jem
ose jam duke kërkuar një titull libri në raft
që më humb përpara syve
ajo s’lodhet së prituri
derisa unë derën ia hap
dhe kur ndodh që në shtëpi mos të qëllojë
ajo ulet dhe më pret
në hyrje të ndërtesës
a në stolat e parkut
ulet në tavolinë
dhe ha nga pjata ime
e llastuar
me mua loz
si fëmijët para gjumit
pastaj shtrihet në krevat
dhe më miklon me ëndje
si kujtim fëmijërie
si dashuria për ato që i dua
dhe zbrazëtia që më mbush
me mungesën e atyre që s’janë më
shpesh duke më shtrënguar
si terri qytetin
në një natë të gjatë dimri
Shkup, 29 maj 2013
Poezia ime nisu
poezia ime nisu
nuk kemi kohë
ngutshëm pavërejtshëm ik ajo
thuaj gjërat tani
tani
mos më thuaj nuk mundem
hidhu syri pa t’u trembur
pa u lodhur hidhu
si një akrobat
nëpër litarët e dhembjes
ditënetët që kaluam bashkë
të lutem kujto
ja vëre veshin në kraharorin tim
dhe dëgjo si buçet ai
ende më shumë tani prapë
nuk e ke të lehtë
e di
barrë të rëndë mbi supe ke mbajtur
çoherë kur unë nga njerëzit jam mërzitur
në prehërin tënd kokën kam mbështetur
dhe gjatë kam pushuar
si në prehër të nënës
nisu poezia ime
përtej maleve shko
përtej fushave
udhëto siç udhëton një i syrgjynosur
e fortë qëndro
poezia ime
dhe sa më parë nisu
Në rrugën Gostivar/Shkup, 28 prill 2016
Do të vish ti prapë
do të vish ti prapë
tek kjo shtëpi
tek kjo shtëpi
që përmallshëm
vështron nga rruga
dhe të pret ty
paçka se zemra jote
do të jetë
si një guralec i ftohtë në shi
si një guralec i ftohtë në shi
se nëna
nuk është më
paçka se si i ardhur nga një botë tjetër
do të vështrosh
shtëpinë tënde
dhe kush shkoi
e nuk u kthye më
se sa shumë gjëra ndodhën
në atë oborr të vogël
se sa shumë gjëra ndodhën
në atë oborr të vogël
dhe prapë mos thuaj
se kurrë më për të ardhur s’ke
se prapë dhe prapë ti do të vish
se kurrë më për të ardhur s’ke
se prapë dhe prapë ti do të vish
Shkup, 19 shkurt 2016
Ku je
a thua ku je
ku të kesh shkuar vallë
e boshatisur dhoma
divani ku ti rri
po unë për ty erdha
e ti asgjëkundi s’je
a thua të kesh dalë tek fqinjët
apo kopshtin je duke vaditur
po ti ke kohë që nuk del prej shtëpisë
tok me dhembjet e tua
aty brenda në dhomë rri
shpesh rrugët e kaluara të jetës duke vështruar
përzier me hijet e pemëve në oborr
në ekranin e dritares
tok me dhembjet e tua
aty brenda në dhomë rri
shpesh rrugët e kaluara të jetës duke vështruar
përzier me hijet e pemëve në oborr
në ekranin e dritares
a thua ku mund të jesh
ku je
o ku je
ku je
o ku je
më vjen të bërtas
dhe zemra më çahet si vazo
dhe zemra më çahet si vazo
Sërmnovë, 31 mars 2016
Juve që asnjë varg do s'iu zë
ua ndjej hapat
ua njoh zërin
diç pëshpërisni në vete
mes vete diç pëshpërisni
dhe nga pas më ndiqni
si endacakë të pashtëpi
që s’dijnë e nesërmja ku i gdhin
me duar të harlisura
nga kalimtarët në rrugë
dhe se si u rreh zemra
ç’dridhërimë trupin ua përshkon
si jetë të shkuara pleqsh
në stolat e parqeve
mbretërinë e rrudhave në ballë
ç’doni o ç’doni të më thoni
e asnjë varg dot nuk iu zë
Daim Miftari ka lindur më 28 prill 1979 në Sërmnovë të Gostivarit, ku ka kryer
shkollimin fillor dhe të mesëm. Ka studiuar në degën e Gjuhës dhe Letërsisë
Shqiptare në Fakultetin Filologjik “Bllazhe Koneski” në Shkup, ku edhe ka
magjistruar për Letërsi Shqiptare. Ka punuar si gazetar, përkthyes dhe
mësimdhënës në shkollë të mesme. Aktualisht është nëpunës shtetëror në
Republikën e Maqedonisë. Ka botuar librat me poezi: "Tingujt e heshtjes" (2007),
"As ëndrra për nesër" (2010), "Vetëm" (2013), "Përtej mureve" (2016). Poezi të
tij janë përkthyer edhe në gjuhën maqedone dhe angleze. Jeton në Shkup.
Comments
Post a Comment