Grevë në uzinën ‘Poezi me breshëri’ shpk

Sot n’uzinë nuk punohet

dikush asht zgju me mendje të keqe

ka shpallë grevë

e nuk asht mjaftu me kaq, por edhe ka blloku.

Uzina asht e randësishme për jetën

njeriu pa ujë mundet me ia dalë, plot shtatë ditë

por pa poezi?

Asht e pamundun me mbijetu shtatë sekonda.

Ai ose ajo që asht në kry të kësaj

asht veç nji njeri me shpirt kriminal

ora po shkon shtatë e na jena ende jashtë

edhe pak njerzia çohet

dojnë poezinë te shtrati

e asgja s’asht gati.

Unë punoj te reparti i poezive me natyrë të dekun

nuk kam arsy me shpallë asgja

jam mirë, ngrohtë, normën e baj

dyqind e tridhetë e shtatë fletë në tetë orë

në nji fletë dy ose tre poezi

në varësi të kërkesave të lexuesit për rreshta.

Pronari i pronarit na ka me sy të mirë

shefi i repartit asht durtrokitë disa herë

për vit të ri vjet kishim nji kile portokalla shpërblim,

jena mirë, kot me u qa,

sa shkoi ora?

Flas me nji gru në moshë

ka shumë vite ajo këtu

punon në repartin e poezive për lirinë

disa herë ia kam pa foton në tabelen e nderit

shkrun poezi të mira, çmimi i poezive të saj asht i shtrenjtë

pronari i ka dhanë nji dhomë në vedi

liria e saj asht revolucionare

e ndjeme

por ajo nuk më përgjigjet

tund kryet e thith cingaren elektronike.

Ti, po, ti që shkrun poezi për lirinë

më thuj

a mundet me u qujtë e drejtë nji grevë e tillë

ajo po dhunon lirinë e lexuesit

si mundet që fmija mos me e pasë e vet sot

ka me e humbë orën e leximit

ka me shku i trishtë në shkollë,

ka me u ndje bosh

e për çka, se nji kryefortë ka blloku gjithçka

e ku, te na?

Gruja e poezive lirimtare

më kthen shpindën e prapë nuk përgjigjet

kur kam kenë e re kam mësu shumë prej durve të saj

sot ajo nuk dënjon me më dëgju

e unë tham gjana të randësishme.

Po si mundet me ndodhë kjo mënxyrë 

pse nuk e çon zanin me kërku atë liri

që shkrun prej shumë vitesh ti?

A nuk i kena të freskëta poezitë

ata që prodhohen sot shiten po sot

janë të ditës, dalin prej gjokseve tanë

të sapo zgjumë prej gjumit

nuk jena si uzinat e tjera që nji pjesë i mbajnë në frigorifer

e disa të tjera i mbajnë në rezervë. 

Pikërisht për këtë kena marrë flamurin e mirënjohjes

Presidenti vjen vetë me na dekoru

dikur ai ka kenë përgjegjës në repartin e poezive feministe.

Kryeministri vetë financon

atë shkollë ku prehen me gërshanë talentet e ardhshëm

ata që kanë me ndjekë traditën tonë.

Sistemi lulzon falë punës tonë

pronarët e pronarëve të pronarit nuk i hedhin paret kot.

Gruja e poezive të lirisë humb në turmën e të pakënaqunve

përpiqem me e kapë

me e kuptu

ndoshta disi edhe ajo e ka blloku

po po, edhe pse asht larg ajo e bllokon me padashjen e saj me hy në zyrë.

Zanat shtohen, diçka në radhën e parë lëviz

edhe unë çlirohem nga ankthi 

dritat e reparteve fillojnë e ndezen ngadalë

turma po shpërndahet

dikush ka qëllu me armë

dikush asht vra

hajt, nji ma pak

zhurma e armës u dëgju

po sigurisht gjithçka ka me u harru

reparti i kritikës asht gjithmonë i pari

janë qitësa të mira

asnjiherë nuk gabojnë shenjë

çdo dalje jashtë rregullit ata e drejtojnë

në repartin e tyne gjenden tana llojet e armëve

qe prej sondazhit e shitjes 

e deri te armët që për hir t'etikës mprehen fort.

Ata kanë edhe nji kovaçanë

janë të zotë, gjejnë devijime mes rreshtave

e pikasin dhe e mbajnë nën kontroll

e në mundësinë e parë qëllojnë

pa iu fshehë publikut

Ata e bajnë për 'te

për hir të shijeve të tij

shije të përcaktume me ligj nga pronarët e pronarëve të pronarit

punëtorët e tij kanë shpirt poetik 

ma shumë se tanë ne.

Sot jena dy orë vonë me poezinë

po na jena të aftë

kapim çdo sekondë

sot normën e kam të lartë

por kam me ndejte deri vonë

t’a çoj poezinë e duhun njeriut tonë të ri

veshi grykësen 

titulli i parë

‘Molla me krymb të lashtë’.