Tu folë me vedi
***
Zjermi mbetet fenomen i lirë
asht e vërtetë se a shtrejtu druni, shkrepsja
po ajri me i dhanë jetë asht i lirë.
Nuk e kanë thanë ende ditën kur ka me u shtrejtu
mundet shpejt, ose e kanë rritë dhe unë s’e kam kuptu
se nuk di ma se çka me llogaritë ma parë.
Fjalët janë boshe, zjermin e merr era.
E kështu në nji marri teme, pasunarsh ndoshta
mora shkrepsen, nji shuk letrash e ula për zjerm
te vendi ku gjanat ende më duken të lira
deri edhe marrija.
Pak dru, i lagësht, me folë atë çka ishte
por dru që digjet shpejt
arka të vogla që i ndërtojnë për mallna
e kur e kryjnë proçesin i hedhin si gjana pa vlerë.
Ndeza letrën e parë, shkrepsja u mbyt e nuk e ndezi
flaka blu vdiq shumë shpejt,
as e dyta, as e treta
veç flakë blu e pastaj shkrumb.
Marr i lexoj letrat që kam marrw me ndezë
sigurimi shëndetsor, fushata për shëndetin
rreziqe, parandalime rreziqesh
vrapo ‘sa nuk asht vonë’,
a nuk ma pat thanë edhe mjeku kshu njiherë?
Provoj letra tjera, kësaj radhe asht sigurimi i fmive,
shpisë, makinës,
jetës ma,
por veç nji dritë e vogël blu e pastaj asgja.
As fletët e detyrave të matematikës e muzikës së fmive
nuk digjen
shkoi shtrejtë ky zjerm
numëroj krandet
janë shumë, por marrija,
ajo, ajo ta fik derën
por ndoshta jo zjermin.
Nji shprese të vogël, e kuqe sigurisht, mbetë varë në nji fletë detyrash
që nuk e lexoj se çfarë landet asht
i fryj, e i fryj deri në marramendje.
Zjermi asht fenomen i lirë,
sa për sy e faqe,
por unë hy te pasunart.
***
Sot kam taku nji gru që fitoi nji euro
në nji treg të madh ku ajo blen përditë jetën
ku dritat punojnë me mëditje
me i dhanë formë diamanti nji grumbulli objektesh
nji mali të madh teneqesh, hekrash, aluminit, xhamash, plasmasit,
diku nëpër ‘ta edhe pak ushqim e nevojë
(kushton nevoja këto kohë)
ku disa durë që fitojnë përditë jetën i kanë sistemu
në forma e xixëllime marramendëse, njisoj si guri magjik
teatër i vërtetë, ku je blerësi i tanave, që prej aktorëve
deri edhe te priza ma e vogël e dritave
atje pra ndodhi mrekullia
nji euro në nji lloto elektronike
loja bahet ma emocionuese nën tanë atë ndriçim
nën tanë ato rrotullime zaresh ngjyrë ari
mahnitja në këtë të dille nuk ka fund
durt e saj te makina janë të njëjtat si durt e mija
si durt e tanve që fitojnë përditë jetën
‘na, ky asht racioni i jetës për ty sot’
‘mos e harxho racionin me jetë të shkume kot’
parrulla që nuk kanë nevojë me u shkru
na kalojnë si mesazhe morse sa herë hyjmë e dalim
të gatshëm mos me përshendetë askend
e me u rrahë me gjithkend për nji rrotë letër bëthet
po pra, më duket edhe mu çudi
se si e takova këtë gru me kaq fat të madh
këtë fat që ajo duhet me e konsumu po aty
nuk duhet me e futë në xhep e me ba çka të dojnë ajo me ‘te
ajo e din që e kanë rrejtë
por luen
unë e di që e kanë rrejtë e gëzohem me lojën e saj
me ndriçojnë sytë
dikur kam me e pasë edhe unë këtë fat
pres vetëm ditë e duhun.
Comments
Post a Comment