Gilmana Bushati: Hana
Hana u zgjue prej nji zhurmet të
lehtë në dhomë. Ktheu kryetin me pa se prej kah vinte, por ishte e lodhun dhe
veç u kthy në krahun tjetër. Nata mendoi dhe u këput. Të nesërmen para se me
dalë në punë rregulloi sa me thanë dhomën e gjumit e diku i hasi kamba fustanin
e vjetër të saj, fustan që s'e dinte se e kishte. E bani palë dhe e futi andej
nga fundi i raftit. 'Ah, Vjola!' Tue dalë nuk harroi me i thanë së bijës
dymbëdhjetë vjeçe 'mas më trazo ma gja te rafti se sa e rregullova'. S'arriti
me e dëgjue përgjigjen, se tashma ishte në
biçikletë për me shku në punë. E niste si e marrë. Ndërsa punonte
mekanikisht asaj iu duk sikur pa me mendje refleksin e dritës në nji pasqyrë,
'po atë fustanin sikur ka nja dy vjet që ia pata falë dikujt'. Se kush e thirri
n'at' moment dhe drita iu zhduk.
Ajo e harroi, por duket se fustani
s’donte me e harrue. Pas nja dy ditësh e gjeti prapë jashtë, te kambtë e
shtratit të saj. Hana nuk e zgjati, po shkoi te dhoma e së bijës e i bërtiti.
Ishte e lodhun me lojnat e saj. Nëse kishte qejf me provue fustanet e së amës,
mundej shumë mirë që me vue gjithçka në vend. E bija iu përgjëru që as nuk
kishte hy në dhomën e s’amës, por kjo e fundit vazhdonte tue bërtitë. Kur u
qetsue prej tanë kësaj situate, Hana e pyti vedin, ‘po Vjola pse nxjerr vetëm atë
fustan e jo të tjerët ?’
Ai fustan i kujtonte gjana të
trishta, grindje familjare, grindje mes s’amës dhe motrës së vet, ku ajo kishte
kenë e pranishme, apo kundërshtinë e të shoqit, Titit, që ajo mos me e veshë. E
kishte veshë nja dy herë, a ma shumë s’e dinte. Kur u kthy në shpi, ajo e veshi
edhe njiherë dhe u pa në pasqyrë. Ndjehej çuditshëm. Kush donte që ajo me iu
rikthye nji kujtimi të tillë? I tha të shoqit që po shkonte te daja i vet, sa për
nji vizitë e nuk kishte të vonume.
-Kur të ra ndër mend për dajë ty…
S’iu përgjigj, por mbylli derën dhe
u ul prej shkallëve. Dajën e gjeti me shokët e vet tue luejt shah në stolat e
lulishtes afër shpisë së tij. Ai e pa me çudi. Edhe ai njisoj si i shoqi, çka e
kishte gjetë që kishte ardhë te ai, se ajo kishte harru se kishte dajë. E mori
për kafe dhe folën për gjana të zakonshme, jeta, shpija, fmija, puna e këto.
Hana pastaj e pyti për të motrat. Ai i tha që i mungonin të afërmit, sidomos e
ama e saj, që i kishte ndejtë afër, kurse me motrën tjetër, Lijen, s’kishte pasë
shumë lidhje, ‘ka kenë si pa terezi e shkreta, askush s’e merrte vesh,
sherrbudallë ka pasë lindë, ashtu diq’.
Pastaj i tregoi fustanin që kishte
veshë. Atij i kujtohej shamata që ishte ba ndër dy shpijat, të shpija e burrit
e së motrës dhe te shpija e s’amës për nja dy fustane, por vetë ai e kishte
harru se si kishte kenë ai fustan.
-Në vend që mos me i veshë, që
me harru shamatën, ajo i veshte si për inat…
-…ia pat qepë Zema, më duket hala
gjallë asht, duer artë gjithmonë, por me ato që i pat qepë Lijes e kishte dhi,
na shtini në ngatërresë kot. Gati ishte tue e nda i shoqi, me shkatërrue familjen për nji copë.
Hana e pyti se kush ishte Zema.
-Ajo nuk qepë ma moj të pastë
daja…asht plakë tesh…rrin njaty te kryqëzimi i Dugajve të Reja, a dera e parë a
e dyta e kam harrue por di që e ka nji derë me ngjyrë te ndeztë, si gabelt, tanë
jetën ashtu.
Mezi priti me u nda me dajën. Donte
me shkue te Zema. Shpejtoi hapat, ma shumë se sa kishte fuqi. Mendoi se ishte
fustani që po e çonte drejt asaj shpijet e jo ajo vetë. Tue i pa njerzit që
shkonin tanë në terezinë e vet, i tha vedit se mendja po i bante lojna të
frikshme. ‘A thu ndonjeni prej këtyne njerzve që shof asht ndje kështu si unë apo kam luejt krejt ?’
S’kishte kohë me u përgjigjë se i
doli përballë dera jeshile e ndeztë. Se pse i krijoi nji emocion të veçantë ajo
derë ashtu nuk e kuptoi, por dora s’arriti me i ra ziles.
-Nuk i punon zilja Zemës, bjeri
fort derës…-i tha nji kalimtar i rastit, që dukej se duhej të ishte kojshi.
Te dera nji dorë hekuri gruje që mbështetej
në nji pllakë të rrumbullaktë po prej hekuri. I ra. Të parën herë lehtë e të
dytën ma fort. Nuk guxoi me i ra për të tretën herë.
Dëgjoi hapa që zvarriteshin në nji
oborr, që dukej se ishte i madh, se mezi po i afroheshin derës. Dikur e hapi
nji zojë, që edhe pse ishte në moshë, ishte e madhe me trup, shpatullgjanë dhe
ma e gjatë se sa Hana.
Zoja sa e pa, mbeti, nuk e pyti as
se kë kërkonte, as çka donte, e as kush ishte. Mbështeti njenen shpatull për derë
e pastaj bani nji hap mbrapa e hapi derën ma shumë dhe e ftoi brendë tue i thanë
me i gjysë zanit ‘erdhe me e marrë ?’
Hana hyni në oborr dhe i tha zojës,
që duhej të ishte Zema, se ndoshta e ngatërronte me kënd tjetër, se ajo
s’kishte porositë gja te ajo, kishte ardhë veç me pytë për diçka krejt tjetër,
që s’kishte lidhje me punën që bante.
Zema tundi kryt, mbylli sytë, tërhoqi
fort frymën dhe pastaj e lëshoi dhe e ftoi brendë. Plot ngjyra oborri prej
luleve, lule edhe brendë, ngjyra ngjyra, ngrohtë gjithandej. Hana mendoi se
edhe në dimën kishin me jetue n’ajri larmia e ngjyrave të stinëve të tjera.
Zema e la pak minuta në dhomën e
ndenjes, e prej nji kthinet i pruni nji kafe në filxhan të vogël. Nuk fliste,
por veç shifte Hanën e dukej sikur ndjehej në siklet para saj, por ishte Hana
ajo që s’e donte vedin aty. S’dinte nga me ia fillue. Sa mori me folë, Zema i
bani me dorë për me i thanë, që s’ishte e nevojshme me u shpjegue.
-…ec me mue…
Hana e la filxhanin dhe ndjeku Zemën
në disa kthina të vogla shpijet shumë të vogla. Dukej se kjo shpi ishte shumë e vogël për 'te, duhej të kish pasë ecë vetëm në njenin krah me hy e me dalë.
U ngjitën te nji shkallë rrumbullake
dhe dolën te nji dhomë të madhe e plot dritë, dielli të mbushte me frymë. Dukej
sikur s’ishte pjesë e asaj shpije. Mure të mëdha e të mbushun me
piktura. Tani para atyne pikturave, i bani pyetje vedit, nëse s’kishte dashtë
ajo me pasë lidhje me artin apo s’ia kishin mësu, s’e dinte, por aty përballë
tanë atyne pikturave, me të cilat s’e shifte lidhjen me vedin, u ndje çuditshëm.
E tanë java me pyetje pa përgjigje, me ecejake me gjetë nji gja, që veç mendja
e lodhun duhej t’ia kishte prodhue, aty iu duk se kishte nji kuptim, por se
cilin nuk po arrinte me e gjetë.
Njena anë e murit ishte e mblume me
perde. Zema e kapi perden e shoqnoi vetë deri në fund. Ngadalë ngadalë para
syve të Hanës po shfaqej nji pikturë e madhe, gati sa nji faqe e murit. Tue vështru
ma mirë pikturën përballë saj, u gjend para nji të papritune që e la pa fjalë.
Zema nuk fliste, po shifte pikturën.
Nuk e kishte mendjen te Hana që kishte humbë në të…
-…ja për këtë të ka prue deri te unë…asht
e jotja tesh…
Hana s’po i besonte syve dhe nuk e
dëgjoi se çfarë i tha Zema. Para saj te piktura, gati sa nji faqe murit ;
ishte nji gru lakuriq, po s’ishte çfarëdo grujet, ishte tezja e vet. E shtrime
në nji divan me mbulesë të kuqe me lule të verdha, krahu i majtë ishte i gjysë
i ngritun e në pëllambën e dorës së tij pushonte kryt, i kry zemrak mbushë me
flokë të kuqe, e krahu tjetër pushonte te kofsha e djathtë. Në vend se me u
sikletosë prej kësaj lakurëqësie, ashtu në fakt si bante me trupin e vet,
kishte kohë që mezi i zhvishej edhe të shoqit, madje kur zhvishej fikte dritën,
atë e mbulunen emocionet. Sa e qetë dukej n’at pikturë. S’e kishte njoftë
asnjiherë tezen e saj kështu. I pa me vëmendje pjesë të pikturës, nuk donte me
u përqëndru te seksi, por erdhi nji moment që sytë iu ngulën aty. Si e kishte mësue e ama ‘asht marre me folë për atë’, ‘tesh ta mëson jeta se çka asht’. Seksi
s’kishte pasë kurrë emën në bisedat me të amën, rrallëherë kur përmendej quhej
‘ai sendi’. Kurse burrat i kishte dëgjue tue e përdorë me njeni-tjetrin veç në
formën e shamjes ose ngacmimit po në zhargonin ma përkeqësus të atij sendit, për
me e ba me u ndje në faj se kishte ‘nji send’. Ajo pjesë e trupit edhe pse
mbulue me nji tis të lehtë leshnash të butë, ishte aty në formën ma të madhe të
mundshme, që veç ia shtoi emocionet dhe iu ngatërrunen mendimet.
Tezja ? Nuk i kujtohej ndonji
bisedë me të, por dinte që e ama i thoshte ‘mos e dëgjo tezen, se ajo asht e
marrë’, apo ‘mos shko te tezja se nuk don baba jot me të pa atje’. Kur shkonte
në të rrallë te ajo, e dinte që s’kishte me u kënaqë se tezja s’kishte fmi e
atje hahej keq dhe jo rregullisht, se ajo ishte gjithnji e zanun me punë, por
ajo si fmi nuk shifte që punën e shpisë të ishin ba, apo t’ishin la enët, por lulet e oborri ishin nji andërr. Dëgjonte shpesh shamatat e tezes me të shoqin,
e i thoshte vedit se kurrë s’kishte me pasë ardhë ma te kjo shpi, së cilës i pëlqente
oborri. Kur ky i fundit i vdiq, nana e baba e saj, por edhe të afërmit e tjerë
i rrallunen shkumjet e ardhjet te ajo. Kishte dekë vetëm dhe sa kishte dekë ia
kishin shitë shpinë.
I kujtohej dita që kishte ardhë
me i ba vizitë për fejesën e saj me Titin. Ajo kishte gati nji muej e pak që
ishte fejue e ajo si teze s’kishte gjetë me kohë me ardhë me urue të motrën
dhe vetë atë. Tezja kishte ardhë pa krehë, veshë me nji fustan të shkurtë, e
ishte marre për moshën e saj me veshë atë lloj fustani, me nji palë këpucë pa
lidhca që ma tepër i mbante si shkarpa. Dhuratën ia kishte mbështjellë me
ambalazhin e makaronave, nji letër e trashë bojë kafe. I ati pat dalë para se
me i ardhë kunata, po e kishte pas porositë të amën që ‘mos ja zgjat shumë, se
asht marre me na e gjetë njerzt e tjerë në shpi at' bibën’. Teze Lija sa kishte
hy e kishte pytë Hanën ‘a e din ti çka asht fejesa?’, ‘po dashnia ? po e
bukura ? a ta ka mësu jat’amë a tesh i mëson vetë ?’ Ajo s’ishte përgjigjë
se kështu e kishin lanë me t’amën. Por motrat u grindën me njena-tjetrën, jo
pse ke ardhë në këtë gjendje, thu se s’ke çka me veshë, jo po kush të pyti ty
se çka me veshë unë, jo po ti duhet me respektu rregullat e shpisë, jo po
rregullat e tueja janë nji mut, me njata rregulla i ke çue për lesh edhe vajzat e
tueja, jo po çka po të duhet çka baj me vajzat e mija, jo po ti je ma e marrë se
unë se i ke e i përdorë vajzat si mallë për burrat e parë që i lypin pa i thanë
se çka i pret ma vonë, jo po martesa jeme ka kenë ma e mirë se e jotja, shif
sot kam fmi e ti çka ke, jo po ma mirë me pasë nji mut se sa me ba fmitë si
bagti tue i ndejtë mbrapa me thupër, jo po a po del jashtë se e teprove, jo po
unë kam kenë tanë kohën jashtë për ty e për vllaznit e mi e s’më ban përshtypje
se po më tregon derën ti tesh…
Kaq mbante mend Hana prej teze
Lijes edhe që kur pat vdekë i patën çue fjalë kojshia, hajde se mbaroi Lija në
mes të rrugës. Akush s’kishte qa n’at shpi. Kishin kry ceremoninë, drekën përkujtimore
e kishin hangër tue folë për gjana krejt të tjera e jo për të shkretën. Pastaj ndonji
kujtim tek tuk, jo shumë i randësishëm. E pat veshë fustanin sa me thanë që
kishte respektue dhuratën e tezes, por pastaj e kishte hedhë diku dhe tesh i
kujtohej mirë që e kishte falë dy vite ma parë. Dhe ja, në nji cep të divanit
ku shtrihej kjo lakuriqësi madhështore, hedhë si shkujdeshëm ishte i njëjti
fustan.
Zema foli butë, pa ia trazu vëmendjen
Hanës.
-Tezja jote i ka pikturue tana. I ka
pikturu te shpija e vet, por këtë të madhen e ka pas pikturue këtu te unë. I
asht dashtë nja nji muj me e kry. Lija për ju ndoshta ka kenë ‘e marrë’ a njeri
i pamarrun vesht, nevrike a ku di unë, veni çfarëdo emnit, por ka kenë e thyshme, mendoj se kjo ka kenë arsyja që iku nga kjo botë, se u
thye e s’u ngrit ma. E kam njoftë se donte me qepë nja dy fustane. Edhe për mue ishte skandaloze që nji grue rreth të gjashtëdhjetave donte me qepë nji fustan
mbi gjuj, por ia kam qepë se u paguva. Pastaj porositi këtë tjetrin që ka në
pikturë dhe që sot e ke ti. I kishte dekë i shoqi dhe nji fustan i tillë mbas
dekës së burrit asht ma skandaloz se ai i shkurti. I hapun deri poshtë, gati me
u dukë gjijt, i ngushtë fort deri te beli e pastaj volan. Vite ma vonë mbas
ikjes së Lijes, kur gratë e qytetit vinin me qepë ndonji gja, thoshin për model
‘ma qep ashtu si ia ke pas qepë Lijes, por pak ma të mbyllun’, ose ‘pak ma të
gjatë’…
M’u lut që në shkëmbim të nji
pagese me shfrytëzue këtë dhomën këtu. Atëherë kur më tha ishte koha e frikës
prej hijes tande, e jo prej nji njeriut që të ofron pare për me e shfrytëzu dhomën. Pastaj më pat shpjegue se ajo pikturonte, se kishte shumë piktura në
shpi, por kishte nevojë për nji hapësinë të tillë për nji pikturë ma të madhe.
U shtyva prej lekut dhe i thashë po. Dhe nji mbasdite me mbërriti në shpi me
disa drrasa…
***
-‘Të kam gjetë drrasa për lulet’…-
Zema mendoi se kjo dukej me taman e marrë, ashtu si ishin hapë fjalë.
-‘Lije, po mu m’u deshën vetëm dy
listela të hollë e jo dërrasa’…po tjetra bani sikur nuk e dëgjoi dhe i hodhi në
mes të oborrit dërrasat që i kishte ngarkue te nji karroce doret.
Mbasi mbylli derën iu drejtue…
-‘E trashë, se po fillojnë e
dyshojnë dynjaja për ndonji gja’…e hyni i punës tue matë e sharru, mat e sharro
e pas nja katër orësh kishte gati skeletin e nji gjaje.
-‘Tesh duhet me i qepë bezen, kena
me e pasë pak problem, se duhet me kenë beze prej nji topit e jo beze të topi
tjetër se nuk i dihet e përzijnë me lloj tjetër…por topin e sjelli sonte.
Zema filloi me pasë frikë prej kësaj
gruje të vogël, që i dukej sikur i fliste me sy të çartun. Pse i kishte thanë
‘po’, s’donte me pasë ngatërresa më njeri e jo ma me sigurimin që nuk ta
zgjaste shumë.
Por për dy ditë, ajo grue e vogël, me nji fuqi që nuk e dinte se nga i dilte, e solli
topin e bezes, e qepi, dyfish gjithandej dhe e nguli për kornizën që kishte përgatitë
vetë. Flokët e gjata e të pakrehuna i ngjiteshin për ballë dhe i vinte shumë era djersë. Zema i
ofroi ndihmë dhe të dyja e ngjitën tablonë e bardhë te dhoma nalt. Listelat në
dy vende u çanë, se Lija s’e kishte llogaritë se sa ngushtë ishte me shku deri
atje, por nuk u mërzit. Kur e ngjitën sipër, ajo e riparoi me nja dy listela
rezervë që kishte. Kur e mbështetën për mur, Lija dukej fort e emocionume, thue se e kishte mbaru krejt punën.
‘-Edhe kështu bardh, a nuk të duket
e bukur ?’ – e pyti Zemën.
Zema e pa edhe njiherë, pasi mendoi
se ndoshta i kishte shpëtu ndonji gja pa e pà ma parë, por jo, beze ma, bardh.
‘-Ti e din Lije, e jotja asht, unë
nuk marr vesht shumë’
‘-Shumë shpejt ke me marrë vesht
edhe ti…
Lija iku, për me ardhë nga darka e
ngarkume me disa strajca. Bojna, brusha e kavanoza.
‘-Hej mar sherr, tanë këta për nji
copë beze ?’
‘-Edhe kam frikë se s’kanë me më
dalë -'
‘-Kam disa kutija bojet që kanë
teprue vjet kur lyva shpinë, nëse të hyjnë në punë, merri’
‘-A dan me tallë bëthën me mu a si,
ec njiherë e më len rehat…’
Zema qeshi nën buzë.
Gratë shifeshin vetëm nadje për me
pi kafen e me shkëmby ndonji bisedë të thjeshtë, darkave para se me fjetë.
Nganjiherë Lija shkonte në shpi të vet e nuk kthehej për dy a tre ditë. Zema
kishte shumë dëshirë me pa se çka kishte pikturue tjetra, por e kishte mbyllë
derën me çils. Pastaj ajo rikthehej, e lame e krehun dhe rifillonte ritmi. Lija
punonte edhe natën se dëgjohej tue lëvizë, dyshemja prej dërraset nuk të
rrente.
Nji natë Lija i mbini në dhomë Zemës
ia ndezi dritën dhe i tha me u zgju. Zema u frikësu se mendoi se kishte ndodhë
ndonji gja.
‘-Mos u tremb, unë jam, por kam
nevojë për ty, pesë minuta’.
‘-A je e marrë a shtihesh, sa asht
sahati ? ‘
‘-S’e di, por ende s’ka zbardhë,
por çoju të lutem’
‘-Po ku me shkue në këtë orë? ‘
‘-Jo, jo s’ke me shkue kund, vetëm duhet me më ba nji nder…’
‘-He, fol njiherë çfarë
nderit ?’
‘-çoju e zhveshu’
‘-jo për njat Zot s’je në terezi,
shko moj grue andej, të kam ba nder tue të lirue dhomë e shpi për ty, tesh duhet
me t’u zhveshë, në këtë orë, a e kupton se s’je në terezi…unë mezi i zhveshem
vedit jo ma ty…ik se po ta tregoj qejfin’.
Ato nuk e ndoqën ritmin e tyne të
zakonshëm. Mezi shkëmbenin përshëndetjet e zakonshme. Zema kishte mendue edhe me e nxjerrë jashtë Lijen bashkë me marrinat e saj. Pastaj i kishte thanë
vedit, se aq e marrë sa asht Lija mund t’i nxjerrte probleme me shtetin, boll
kishte kaq, se prania e Lijes te shpija e saj, s’do të kishte ndejtë pa ra në
sy. E përjashtoi si mundësi dhe ia la ditëve me e gjetë ato mënyrën e sjelljes
ndaj shoqes. ‘Nji grue më thotë me iu zhveshë lakuriq…iiiii, marre e turpi i
Zotit’. ‘Po unë vetë, a nuk i zhveshi në nji farë mënyre gratë për me ia marrë
masën e trupit për me i qepë ato pak dëshira që kanë’ -pyste vedin Zema. ‘Po,
por unë kurrë nuk i kam zhveshë lakuriq…po a i kam mendue ndonjiherë lakuriq për
me ia ba simbas trupit rrobat…punë e ngatërrume, ku nuk m’i çon mendimet ajo
dreq, boll mirë isha në terezinë teme’.
Nji natë Zema po i jepte dorën e
fundit nja dy fustaneve. E reja që e kishte porositë martohej dhe i donte për
shpejt dhe ajo ishte pak me vonesë, prandaj kishte vendosë me ndejtë deri vonë.
Kur dëgjoi hapat e Lijes mbrapa saj. Nuk u kthye. Ajo ulej shpesh jo me pi ujë,
jo me shkue në banjo ose me ba kafe. Por ajo iu afru deri afër mbas shpinës dhe
i hodhi durt në qafë. E përqafoi. Pastaj i kërkoi të falun. Zema nuk u përpoq
me e largu.
‘-Ti je në botën tande, jo të tanë
e kuptojnë, ashtu siç ti nuk e kupton këtë temen’…
‘-S’kanë shumë ndryshim këto dy botë
Zemë, a nuk bashkohena te e bukra e trupit unë e ti dhe gratë që porosisin
tesha te ti…sa prova ban ti për nji fustan apo për ndonji fund…kur nuk të pëlqen
puna që ke ba, nuk i thue tjetrës që e ke qepë keq, por i thu me ardhë njiherë
tjetër për provë…’
Zema nuk iu përgjigj.
Dy ditë ma vonë, ajo e ftoi Lijen për
kafe. Kishin kohë që s’e pinin bashkë. ‘Këtë të shkretë e kena me kursim, por
me ndejtë bashkë s’duhet me e pasë kursim’, i tha ndërsa pinin kafen. Pastaj u
ngrit dhe shkoi te kthina ku gratë banin provë teshat që kishin porositë me qepë.
E pastaj doli e zhveshun. Me njenin krah mbante fshehun gjoksin e me dorën tjetër
fshihte seksin. Lija u çel. I tha veç me u shtri te divani ku po pinin kafe dhe
me mos me mendu asgja. Zema ishte shumë ma e re se Lija, por valët e marres e të
turpit i shkonin e i vinin tue e ndezë në fytyrë.
Kur Lija iu afru, Zema u tremb.
Tjetra e qetsoi dhe ia rregulloi pak pozicionin e durëve. Tashma Zema ishte
krejt lakuriq para nji gruje tjetër. Por edhe pse e zorshme, e kishte marrë atë
vendim. Lija u ngjit shpejt nalt, e erdhi me nji dorë lapsa e nji tufë letrash.
Ndërsa punonte ndër letra nji dell ia ndante ballin në gjysë. Punonte në marri,
deri sa i tha që kishte mbaru. Zema shkoi të vishej dhe kur u kthy pa vizatimet
e Lijes. Ishte trupi i saj në tana skicat, e zhveshun. U emocionue kur pa vijat
e lapsave.
‘-E çka don me ba me këto
skicat ?’
‘-Kur të mbaroj tablonë, janë të
tuejat’…
***
-Kur e ka mbarue pikturën më ka lejue me u ngjitë nalt. Kam pasë mbetë pa fjalë. Me skicat e trupit tem kishte arritë
me pikturue trupin e zhveshun të nji gruje gjashtëdhjetëvjeçare, jo perfekt, por
bukuria s’ka pasë lidhje me të qenunit perfekt, këtë ma ka mësue puna jeme e
tezja jote – i tha Zema Hanës. Ajo s’kishte fjalë me shpjegue emocionet që
kishte provu ditën që kishte pa pikturën.
-Janë ndjenja që nuk i përkasin tokës
që shkelim me kambë, janë shumë nalt, – vazhdoi Zema – çdo linjë e kam prekë me
bula gishtash se s’doja me u ulë këtu poshtë, doja me ndejtë aty për shumë kohë.
Ajo i tha pastaj, se në sajë të këtyne
emocioneve që kishte përjetu atë ditë, gati kishte kenë tue u rrahë me Lijen,
kur kjo e fundit i kishte thanë se donte me i djegë tana pikturat që kishte ba,
sepse s’ia vlenin me i lanë gjallë kur ajo kishte me ikë. Zema i shpjegoi se
tezja e vet, pak para se me ikë, kaloi kriza të forta.
-Jo marrijet jo, po se s’kishte ku
me jetue me botën e vet të madhe, se vendi ishte shumë i vogël për 'te dhe për këtë
nuk donte me lanë dëshmi të kësaj bote mbushë tanë bukuri e dashni – dhe u
mbush me frymë.
-Kam pasë shkue me nji kojshi këtu për
me marrë nji baule te Lija. Kam pas futë disa piktura, nuk i zuni të tana. Lija
s’donte që me ia marrë, e kam pas shty, isha ma e fortë se ajo. Ia pata marrë
me zori. Dy rrugë pata ba me ia marrë të tana. Kojshia u habit e më pat thanë
‘sa baule paska kjo gruja allahile’.
Zema i tregoi se në ditët e fundit,
kur ajo e kuptoi se të dyja duheshin me u nda disi me njena-tjerën, Lija i
erdhi në shpi. U ul para pikturës së vet dhe u mallëngjye.
-Më tha që tana me i mbajtë, veç
nudos. Atë me ia lanë Hanës, më tha. E pata pytë pse ty, kishte dhe mbesa apo
nipa të tjerë. U pat përgjigjë, se askush s’kishte për ta kuptu, madje as ti
jo, por kishte pak shpresë, se mund të ishe ma ndryshe. Pata ngulë kambë, pse
ma ndryshe. Atëherë më shpjegoi, që a më kujtohej ajo ndjenja që kisha provu
kur kisha pa nudon e saj, iu pata përgjigjë që po. Të njëjtën ndjenjë kishte
pas provu ajo kur kishte pa hanën natën kur ke lindë ti. Se ishte ndalë dhe mbështetë
për prag dritarejet dhe e kishte shijue atë mrekulli. Se ashtu pa u veshë edhe
pse natë, kishte ngà vrap te materniteti, i kishte ba za nanës tande, ajo e
shkreta ishte zgjue prej gjumit dhe kishte dalë me pytë se çka kishte e motra
n’at orë të natës. I ishte lutë, që për at’ dritë hanet, vajzës që sapo kishte
lindë me i vendosë emnin ‘Hanë’.
Comments
Post a Comment