Tregim me ‘na ishte njiherë’
‘Na ishte njiherë nji
nusekakashare, e bukur si tana nusekakasharet, por e dobët, e kishin rritë me
pak bukë, pak ujë, pak diell, pak erë, ngapak për gjithçka. U rrit kjo
nusekakasharja, u ba e madhe me trup, krahët gati me fluturu, por jo shumë gjatë,
se lodhej. Jetën e njifte aq sa kishte hangër, pa, pi e nxehë. Dinte vetëm kaq,
‘jeta ka grabitqarë’, por s’ia kishte pa asnjiherë ftyrën kësaj kafshe të
madhe, te zezë e të pashpirt…sigurisht kishte frikë me e taku, s’ishte gati për
me e përballu.
Kur filloi me ndërtu folenë e vet, rrugës tuj mbledhë
kashë e fije të holla të grunit të teprum ndër fusha, qëlloi me taku nji yll të
bukur, nji si ajo, insekt si ajo, njashtu me pulla të zezë në nji pelerinë te
kuqe…ai filloi me e ndihmu për e mbulu folenë nga jashtë me kashtë, pastaj, ashtu
butë, i tha, se s’e kishte ba mirë, se kështu si e kishte nisë ajo, kurrë
s'kishte me ba nji gja të bukur e të banushme, e ai dinte shumëçka ma mirë se ajo. Kështu asht bota, 'ai din ma mirë se ajo'.
Ai filloi me i kërku që ajo me mbledhë
kashtën në fushë e ai me e ndërtu ashtu si duhej. Ai ishte i fortë, i bukur, e me kalimin e kohës, zani iu ba i
trashë. Çdo vit ndërtonin nji fole të re, ku shëtisnin pa pelerinë dhe tre
nusekakashare të vogla. Ajo mblidhte fushave kashtën, ai e ndërtonte.
Nusekakasharja
kish lindë e rritë e dobët, por u ba edhe ma e dobët. Foleja s’kishte asnji gja
të sajën, as vocrrakët. E përditë ma tepër kishte frikë. Jo ma prej
grabitqarit, atij hala s’ia kishte pa ftyrën, por prej atij insektit që kishte
në shpi, prej atij të fortit, za trashit, vetull trashit, që me kalimin e
viteve pelerinën e kuqe e kishte ndërru me te zezë. Ata të dy s’ishin ma i
njejti insekt.
Tash kishte frikë me e lanë edhe folenë, se atje jashtë, pa asnji
tjetër në krah të sajin s’kishte me kenë ma ajo që ishte. Ai i kishte
thanë, se nëse e kalonte pragun e folesë së tij, kishte me humbë antenat, krahët,
ngjyrat, e kishte me u kalbë në mesin e askundit. E tmerronte ideja e kalbjes. Shumë
shoqe të tjera, që kalonin nën folenë e saj, ishin njisoj si ajo, mbanin mbi
shpindë veç pelerinës edhe frikën e kalbjes.
Por ishte edhe ndonji, që kishte
lanë fole dhe s’ishte kalbë. Nji ditë, guxoi dhe pyeti njenen prej tyne, se çfarë
magjiet kishte përdorë për mos me u kalbë mbasi kishte lanë folenë e insektit të
vet. Ajo kishte qeshë me të madhe para syve të saj. ‘Kur foleja jote ta merr
frymën, kjo asht kalbje zemër’. I shkroi në mend tanë këto fjalë dhe i mendonte
çdo ditë në fole, ku gjithmonë e ma shumë mungonte ajri. Kur i kishte thanë
insektit të vet, që shpija nuk ajrosej mirë, ai e kishte picku fort, gjak ia
nxori gjoksin, ia preu antenat e i tha se ajo kishte aq ajër sa i duhej, jo ma
shumë, se me ma shumë bahej merimangë. Dikur ai i vendosi, që meqë kashtën e mbante në shpindë, s’kishte ma nevojë për krahë…ia mori
ai, i duheshin ma shumë se ajo, i duheshin dy palë.
Mbas shumë vitesh, ajo,
fjalët e së cilës i silleshin ende ndër mend a kanjiherë në andrra, kaloi prapë
afër folesë…e varfën njisoj si ajo, por e qeshun, me krahë tanë shëndet, i shëndrinte
pelerina e kuqe…ajo e njofti dhe i foli, 'Oh, zemër, pse kaq shkurt flokët ti’…
‘Insekti jem i dashtun, e i fortë, ai që më mbron prej të këqija,
më ka thanë se flokët e shkurta mbajnë larg merimangat e zeza, këto grabiqare që
na marin frymë e ajrin e shpisë…e unë qysh se kam kenë fmi kam pasë frikë prej
këtyne grabitqareve…
Kur hyni nji ditë në fole insekti, i madh, i zi, me za bubullues, e gjeti të kalbun, atë që kishte tepru prej nji
nusekakashareje, dikur e bukur fort’…e shtyvi me kambë deri jashtë derës së
folesë e filloi me ndërtue rrjetën për nji nushekakashare tjetër.
Comments
Post a Comment